Main yahan din gin rahi hun
Tum mujhse milne aaogi na maa

Neend ab aankhen churaati hai mujhse
Tumhari god main jo sukoon bhul aayi thi main woh leti aaogi kya

Saasein tham si jaati hai mushkilon par
Tumhare seene mein chhupi meri dhadkan leti aaogi kya

Main yahan din gin rahi hun
Tum mujhse milne aaogi na maa

Himmat kho si jaati hai aksar meri
Tumhare haath mein jo meri taakat rakhi hai wo leti aaogi kya

Haath chuttta jaa raha hai sapnon se
Tumhari saree ki us gaanth mein meri duayen leti aaogi kya

Main yaha din gin rahi hun
Tum mujhse milne aaogi na maa

Akela paraya khud ko paa rahi hun
Tumhare muskaan mein jo apnapan hai leti aaogi kya

Khud ko khoti jaa rahi hun har din main
Tum mein jo main hun leti aaogi kya

Main yahan din gin rahi hun
Tum mujhse milne aaogi na maa

– MissBalance (Jiyana Jethani)